فْتِيلْ الدَّمْعَة ،،
رَدُّونِي رَدُّونِي
وَ يْلَا شَتُّونِي غْرُوبْ
طَالْگََة حْمُورْتِي بِينْ المْوَاجْ
لَا تْرَسْمُونِي قْصُورْ عَالرْمَلْ
يَمْحِيهَا البْحَرْ إِلَا هَاجْ
وَ يْلَا شَتُّونِي غْرُوبْ
طَالْگََة حْمُورْتِي بِينْ المْوَاجْ
لَا تْرَسْمُونِي قْصُورْ عَالرْمَلْ
يَمْحِيهَا البْحَرْ إِلَا هَاجْ
رَدُّونِي رَدُّونِي
وَ يْلَا شَتُّونِي شْمُوعْ
شَاعْلَة فْتِيلْتِي بِينْ الظْلَامْ
لَا تْگَطْرُونِي دْمُوعْ عَالصْبَرْ
يَمْحِيهَا الزْمَانْ إِلَا دَارْ
وَ يْلَا شَتُّونِي شْمُوعْ
شَاعْلَة فْتِيلْتِي بِينْ الظْلَامْ
لَا تْگَطْرُونِي دْمُوعْ عَالصْبَرْ
يَمْحِيهَا الزْمَانْ إِلَا دَارْ
طَلْگُونِي طَلْگُونِي
وَيْلَا شَتُّونِي غْرِيبْ
دَايَخْ بِينْ الوَادْ جَامَحْ
لَّا تْخَلُّونِي دَارَحْ
طَلْگُونِي غْوَاتْ فِالگَصْبَة
صْيَاحْ لَا تْخَلُّونِي سْبُولَة
نَابْتَة فِطْرِيقْ سَارَحْ
وَيْلَا شَتُّونِي غْرِيبْ
دَايَخْ بِينْ الوَادْ جَامَحْ
لَّا تْخَلُّونِي دَارَحْ
طَلْگُونِي غْوَاتْ فِالگَصْبَة
صْيَاحْ لَا تْخَلُّونِي سْبُولَة
نَابْتَة فِطْرِيقْ سَارَحْ
خَرْجُونِي خَرْجُونِي
مِنْ شْعَابِي صْيَاحْ
سَمّْعُونِي
غَوْتَة فْحَنْكْ البَرَّاحْ
مَا هِي زْگَى وَلَّا نْوَاحْ
يْگَعَدْ لْسَانِي إِلَا طَاحْ
وْلَا يَطْلَقْ فِينَا السْرَاحْ
يَتْخَلَّطْ عْلِينَا نْبَاحُو
فْسُوقْ الدْلَالَة تَبْرَاحْ
مِنْ شْعَابِي صْيَاحْ
سَمّْعُونِي
غَوْتَة فْحَنْكْ البَرَّاحْ
مَا هِي زْگَى وَلَّا نْوَاحْ
يْگَعَدْ لْسَانِي إِلَا طَاحْ
وْلَا يَطْلَقْ فِينَا السْرَاحْ
يَتْخَلَّطْ عْلِينَا نْبَاحُو
فْسُوقْ الدْلَالَة تَبْرَاحْ
خَلِّيوْنِي خَلِّيوْنِي
طِيرْ يَلْگَطْ حَبَّاتُو وْرَعْ
مِنْ تْرَابْ الگَاعَة
وَقْتْ الصَّبَا إِلَى رْجَعْ
يَنْقَبْ گَمْحَاتُو زْرَعْ
يَمْسَحْ مَنْقَارُو فِالجْنَاحْ
تَسْمَعْ تَگْرَاعُو رْضَى
يْغَرَّدْ جُوعُو دْعَى إِلَا شْبَعْ
طِيرْ يَلْگَطْ حَبَّاتُو وْرَعْ
مِنْ تْرَابْ الگَاعَة
وَقْتْ الصَّبَا إِلَى رْجَعْ
يَنْقَبْ گَمْحَاتُو زْرَعْ
يَمْسَحْ مَنْقَارُو فِالجْنَاحْ
تَسْمَعْ تَگْرَاعُو رْضَى
يْغَرَّدْ جُوعُو دْعَى إِلَا شْبَعْ
رَدُّونِي رَدُّونِي
لَا تَسْقُونِي مْرَارَة
حَاتْلَة فِالگَاعْ
لَا تْحَلْبُو دَمْنَا حْلِيبْ
تْرَوْبُو الخَادَمْ
فِگَلْبْ الشَّكْوَة نَخْضَاتُو
البْهِيمَة رَضَّاتُو گِيحْ سَايَحْ
مَا رَضْعَاتُو گَاعْ
لَا تَسْقُونِي مْرَارَة
حَاتْلَة فِالگَاعْ
لَا تْحَلْبُو دَمْنَا حْلِيبْ
تْرَوْبُو الخَادَمْ
فِگَلْبْ الشَّكْوَة نَخْضَاتُو
البْهِيمَة رَضَّاتُو گِيحْ سَايَحْ
مَا رَضْعَاتُو گَاعْ
عَدْرُونِي عَدْرُونِي
مَا گَادِّيتُو فِينَا عْبَارْ
وَلَّا عْجِينْكُمْ فِالوَصْلَة
خْمِيرُو دَاعْ
هَا العَارْ
مَا تْخَلِّيوْ احْلَامْنَا
فِالدْلَالَة تَفْسِيرْهَا يَتْبَاعْ
لَا تْزَرْعُو عْظَامْنَا
عَشْبَة دَابْلَة
رَاشْگَة بِينْ الخُشْلَاعْ
لَا تْغَطِّيوْ خْمَاجْكُمْ
عْلِينَا بالغَرْبَالْ
يْرُشْنَا عْطوُرْ عَالغْمَالْ
العِيدْ إِلَا جَا
يَلْگَى خْصَامْنَا عَالهْلَالْ
وَ الوَادْ إِلَا حْمَلْ
لَا حَدْ فِينَا يَلْگاهْ
لَا تْغَرْبْلُو عْشُوبْكُمْ بْشَبْكَة
صَوْتْ الحَقْ فِيهَا ضَاعْ
وَلَّا دُگُّو صَبْرِي
عْلَى مَهْرَازْ بَلَّاتِي
رْكَبْتُو انْتُمَا وَنْزَلْنَا للگَاعْ
مَا گَادِّيتُو فِينَا عْبَارْ
وَلَّا عْجِينْكُمْ فِالوَصْلَة
خْمِيرُو دَاعْ
هَا العَارْ
مَا تْخَلِّيوْ احْلَامْنَا
فِالدْلَالَة تَفْسِيرْهَا يَتْبَاعْ
لَا تْزَرْعُو عْظَامْنَا
عَشْبَة دَابْلَة
رَاشْگَة بِينْ الخُشْلَاعْ
لَا تْغَطِّيوْ خْمَاجْكُمْ
عْلِينَا بالغَرْبَالْ
يْرُشْنَا عْطوُرْ عَالغْمَالْ
العِيدْ إِلَا جَا
يَلْگَى خْصَامْنَا عَالهْلَالْ
وَ الوَادْ إِلَا حْمَلْ
لَا حَدْ فِينَا يَلْگاهْ
لَا تْغَرْبْلُو عْشُوبْكُمْ بْشَبْكَة
صَوْتْ الحَقْ فِيهَا ضَاعْ
وَلَّا دُگُّو صَبْرِي
عْلَى مَهْرَازْ بَلَّاتِي
رْكَبْتُو انْتُمَا وَنْزَلْنَا للگَاعْ
رَدْمُونِي رَدْمُونِي
لَا تَبْنِيوْ حْيُوطِي عَالجْرَاحْ
تْحَرْشُوهَا بِعْكَرْ وَ خْلَالَة
تْرَدْمُو القْوَاسْ
تَرْمِيوْ بِرْدَمْهَا الظْلَالَة
تَزْدِيوْ البْرَاجْ مِنْ العَاجْ
مَا تَمْنَعْ الوَادْ إِلَا هَاجْ
مَا دَرْتُو طَايْسَة
مَا قْضِيتُوا الغْرَاضْ
يْثُورْ الهْيَاجْ نْخُرْجُو هَايْشَة
مَنْ ضَلْعْ العْوَاجْ
وَاشْ يَثِيقْ العْظَمْ فِالجْبِيرَة
إِلَى اعْوَاجْ
لَا تَبْنِيوْ حْيُوطِي عَالجْرَاحْ
تْحَرْشُوهَا بِعْكَرْ وَ خْلَالَة
تْرَدْمُو القْوَاسْ
تَرْمِيوْ بِرْدَمْهَا الظْلَالَة
تَزْدِيوْ البْرَاجْ مِنْ العَاجْ
مَا تَمْنَعْ الوَادْ إِلَا هَاجْ
مَا دَرْتُو طَايْسَة
مَا قْضِيتُوا الغْرَاضْ
يْثُورْ الهْيَاجْ نْخُرْجُو هَايْشَة
مَنْ ضَلْعْ العْوَاجْ
وَاشْ يَثِيقْ العْظَمْ فِالجْبِيرَة
إِلَى اعْوَاجْ
شْكُونْ گَالْ
الفْسَادْ كِي الغُوفَالَة
يْدِيرْ سْوَالَفْ
وَلَّا الظّـُلْمْ إِلَى شَابْ
يْدِيرْ جْذُورْ
وَلَّا غْوَالْنَا يَتْحَالْفُو غْدَرْ
مْعَ الحْلَالَفْ
يَاكْ تْرَيَّسْ الغْرَابْ عَالغَلَّة
وَ خْوَا القْرَابْ
لْبَسْ النْبَالَة وَ دَارْ نْگَابْ
عْلَاشْ يَا نَاسْ نَاكْلُو قُوتْنَا
كِيفْ الغْلَالَة بِالفْلَايْلْ
تَعْوَاجْ إيَّامْنَا
وَ يْوَلِّي خْمِيسْنَا عْقَايْبْ
طَلْگُو نْيَابْ الجْهَالَة
عَالقْرَايَة عَاقْبُو الفْرَاخْ
يْدِيعْ دَمُّو تْسِيلْ دْمُوعُو
تَسْرَحْ هْمُومُو بِينْ الجْرَاحْ
لَّا تْگَطْرُوا مَنَّا الشْهْدَاتْ
فْ قَلُّوشْ سَمْنُو حَايَلْ
تْبِيعُوا الجْبَاحْ
تْگُولُو عْسَلْنَا حَارْ
اليُومْ خَايْبْ غَدَّا يَتْلَاحْ
الفْسَادْ كِي الغُوفَالَة
يْدِيرْ سْوَالَفْ
وَلَّا الظّـُلْمْ إِلَى شَابْ
يْدِيرْ جْذُورْ
وَلَّا غْوَالْنَا يَتْحَالْفُو غْدَرْ
مْعَ الحْلَالَفْ
يَاكْ تْرَيَّسْ الغْرَابْ عَالغَلَّة
وَ خْوَا القْرَابْ
لْبَسْ النْبَالَة وَ دَارْ نْگَابْ
عْلَاشْ يَا نَاسْ نَاكْلُو قُوتْنَا
كِيفْ الغْلَالَة بِالفْلَايْلْ
تَعْوَاجْ إيَّامْنَا
وَ يْوَلِّي خْمِيسْنَا عْقَايْبْ
طَلْگُو نْيَابْ الجْهَالَة
عَالقْرَايَة عَاقْبُو الفْرَاخْ
يْدِيعْ دَمُّو تْسِيلْ دْمُوعُو
تَسْرَحْ هْمُومُو بِينْ الجْرَاحْ
لَّا تْگَطْرُوا مَنَّا الشْهْدَاتْ
فْ قَلُّوشْ سَمْنُو حَايَلْ
تْبِيعُوا الجْبَاحْ
تْگُولُو عْسَلْنَا حَارْ
اليُومْ خَايْبْ غَدَّا يَتْلَاحْ
رَدُّونِّي رَدُّونِي
لَا تْرَفْدُونِي فْرَارَة
تْخَلِّوْنِي حْلِيبْ
عَالتْرَابْ فَايْضْ
وَلَّا دَمْنَا سَايَبْ
عَالذَّاتْ يَغْزَلْ قْصَايْدْ
لَا تْجَرُّونِي شُوكَة بِينْ الظْفَارْ
تْنَصْلُو رَاسْهَا
تْخَلِّيوْ الضَّرْ غَارْگ فِينَا
يْدِيرْ غْرَايْبْ
لَا تْكَمْدُو الضَّرْسَة بِالكْلَامْ
وَ تْخَلِّيوْ فُمْنَا عَايَبْ
لَا تْوَلْفُونَا كُلَّابْ
يَخْلَعْ النَّابْ وَ يْخَلِّي العَيْبْ
تَحْتْ صْدَاغْنَا سَايْبْ
لَا تْرَفْدُونِي فْرَارَة
تْخَلِّوْنِي حْلِيبْ
عَالتْرَابْ فَايْضْ
وَلَّا دَمْنَا سَايَبْ
عَالذَّاتْ يَغْزَلْ قْصَايْدْ
لَا تْجَرُّونِي شُوكَة بِينْ الظْفَارْ
تْنَصْلُو رَاسْهَا
تْخَلِّيوْ الضَّرْ غَارْگ فِينَا
يْدِيرْ غْرَايْبْ
لَا تْكَمْدُو الضَّرْسَة بِالكْلَامْ
وَ تْخَلِّيوْ فُمْنَا عَايَبْ
لَا تْوَلْفُونَا كُلَّابْ
يَخْلَعْ النَّابْ وَ يْخَلِّي العَيْبْ
تَحْتْ صْدَاغْنَا سَايْبْ
رَدُّونِي رَدُّونِي
وْلَا مْشِيتْ غِيرْ خَلُّونِي
لَا تْشَدُّو عْلِيَ صْدَاقْ
لَا تْقَوْمُونِي دَيَّة
لَا تْجَرُّونِي بْتَاتْ
وَلَّا دْفُوعْ فِهْدِيَة
يْهَزْكُمْ حَالْ الغَيْطَة
فْلِيلَة الدُّخْلَة تْعَنَّاوْ بِيَا
تْرَشُّونِي دَمْ فِلْحَافْ بْيَضْ
يَبْهَاتْ لُونُو فِيَّا
مَا انَا عْرُوسْ مَا انَا عَزْبَة
يَتْبَاهَاوْ بِيَّا وَالْدِيَا
وْلَا مْشِيتْ غِيرْ خَلُّونِي
لَا تْشَدُّو عْلِيَ صْدَاقْ
لَا تْقَوْمُونِي دَيَّة
لَا تْجَرُّونِي بْتَاتْ
وَلَّا دْفُوعْ فِهْدِيَة
يْهَزْكُمْ حَالْ الغَيْطَة
فْلِيلَة الدُّخْلَة تْعَنَّاوْ بِيَا
تْرَشُّونِي دَمْ فِلْحَافْ بْيَضْ
يَبْهَاتْ لُونُو فِيَّا
مَا انَا عْرُوسْ مَا انَا عَزْبَة
يَتْبَاهَاوْ بِيَّا وَالْدِيَا
رَدُّونِي رَدُّونِي
وْلَا رْشِيتْ غِيرْ خَلُّونِي
لَا تْصَبْغُونِي بِلْوَانْ الزُّيفْ
تْقَوْمُو عْوَاجْكُمْ عْلَيَّ
لَا تْنَصْلُونِي بَالِي
وَ تْلَبْسُو جْدِيدْكُمْ شْفَيَّة
يَاكْ نْهَارْ شَفْتْ الدَّنْيَا
لْگِتْهَا غْرِيبَة مَسْبِيَة
لَا عْطَرْهَا فَاحْ
وَلَّا حَنَّتْهَا كْحَالَتْ فِيدِيَا
وْلَا رْشِيتْ غِيرْ خَلُّونِي
لَا تْصَبْغُونِي بِلْوَانْ الزُّيفْ
تْقَوْمُو عْوَاجْكُمْ عْلَيَّ
لَا تْنَصْلُونِي بَالِي
وَ تْلَبْسُو جْدِيدْكُمْ شْفَيَّة
يَاكْ نْهَارْ شَفْتْ الدَّنْيَا
لْگِتْهَا غْرِيبَة مَسْبِيَة
لَا عْطَرْهَا فَاحْ
وَلَّا حَنَّتْهَا كْحَالَتْ فِيدِيَا
گَدُّونَا گَدُّونَا
يَاكْ گَمَّاطْنَا وَاحَدْ
مَا فَرَّقْ بِينْ عَزْرِي وْ دَرِّيَة
وَ فْيَاقْ السَّرْوِيَة
مَاطَفْرُو لْلحَادْگَة
عَادْ تَفْرَحْ لِيهْ الزُّغْبِيبَة
يَاكْ مَصْرَانْ الزْيَادَة
گَطْعَاتُو القَابْلَة
وَ سْبَقْنِي غْوَاتِي لِلدَّنْيَا .
يَاكْ گَمَّاطْنَا وَاحَدْ
مَا فَرَّقْ بِينْ عَزْرِي وْ دَرِّيَة
وَ فْيَاقْ السَّرْوِيَة
مَاطَفْرُو لْلحَادْگَة
عَادْ تَفْرَحْ لِيهْ الزُّغْبِيبَة
يَاكْ مَصْرَانْ الزْيَادَة
گَطْعَاتُو القَابْلَة
وَ سْبَقْنِي غْوَاتِي لِلدَّنْيَا .
فْتِيلْ الدَّمْعَة ،،
بقلم حكيم البورشدي
بقلم حكيم البورشدي
ليست هناك تعليقات:
إرسال تعليق