اوبريت غنائي ( الليلة الحميمة ) للشاعر / محمد عليش متولي

.. بالعاميه المصريه ..
.. أوبريت غنائــــى ..

......... ( الليلــه الحميمــــــه .. )

الفصل الاول ..
اللوحه الاولى : -

اللحظه السعيده حقيقى ..

بالفاتحه المتينه ..

والليله الحميمه بتيجى ..

بالدبله السمينه ..

والحنه الجميله .. الحنه ..

الحنه الجميله .

الحنه الطبيعى بتيجى ..

قبل الليله بليله ..

الحنه فى إيدينا الحنه ..

بتغازل عنينا ..

بتبات يوم وليله الحنه ..

فى كفوفنا ورجلينا .

................

اللوحه التانيه : -

والليله الكبيره الليله ..

والمعازيم كتيره ..

والبنات فتافيت السكر ..

والستات جميله ..

بفاستين السهره البمبى ..

والفساتين البيضا ..

والنجمات الليله بتسحـر ..

بعيونها الكحيله ..

والكوشه وعريسنا الحيله ..

وأصحابه السهِّيره ..

والرِِوِِشه العروسه العسله ..

القمره الأصيله .
.....................

اللوحه التالته : -

صحبات العروسه القمره ..

وصيفات مستحيه ..

ودقيقه بدقيقه بتكتر ..

حوالين العروسه ..

ننوسه يا عروسه وخفه ..

وعيونك كحيله ..

وجفونك ورديه ورقه ..

ورموشك طويله ..

وخدودك خوخيه شهيه ..

وشفايفك نديه ..

والليله الحميمه الليله ..

والأشواق شقيه ..

وهوانا مفتاحه فِ إيدينا ..

وكفوفنا محنيه ..

الليله الحميمه الليله ..

والمعازيم كتيره .

...................
...................

الفصل التانى من الليله الحميمه ..
اللوحه الاولى : -

يا دبلة الخطوبه ..

يا دهبى مدوره ..

حليتى مشكله ..

شبكتنا بالهوا ..

يا دبلة الخطوبه ..

يا شمعه منوره ..

فى حياتنا او فى الصوره ..

ومولعه بالهوى .

...................

اللوحه التانيه من الفصل التانى ..
* ضم النسيم : -

ريحة البخور فاحت ..

بالصدر والنغاشيش ..

ونار الغرام ولعت ..

فى القلب والأحاسيس ..

والفرحه والزغاريد

عملوا دماغ بصحيح

والدم فِ الشرايين

سبق الهوا والريح .

والضغط ع الأعصاب ..

مد إديه عالتاج

وعُيونه ع العِنّاب ..

وصوابعه فى التضاريس .

والفل مال وإنسال ..

على قدها المياس

والليل جميل ع النيل ..

وشراع هوانا ( خلاص )

والياسمين مجنون

بليله فيها الهوى

ح يضم ( نسمه ) بشوق ..

ويطفى نار الجوى ..!
...........................
...........................

الفصل التالت الاخير ..
اللوحه الاولى : -

فرحان قوى وممنون

للطبله والمزامير

أصل الهوى إنسان

كفوفه بتهفهف

على ( نسمه ) من ريحان

عاوز قوام تقلع ..

فيبان قوام فتان

يميل ويتمتع .

ييجى الهوا فرحان

يقطف من الرمان

يرشف ندى العناقيد

يسمع دُعا الكروان

يطرب من التناهيد .

......................

اللوحه التانيه من الفصل التالت : -

يروح الهوا المفتون

يطل جوه العيون

يلقا بحور الغرام

بتموج بحب الكون

وطقوس فنون الحياه

يزعق يقـــــــول :-

اللــــــــــــــه ..

لسَّه ما بينا فراغ .. ؟

لسَّه ما بينا كتير .. ؟

دول خطوتين إتنين

دا مستحيل ..

دول ألف ميل ..

مشوار طويل ..

والنبض جوه الوش

بينادى لفــــــؤادى

والرغبه فوق الرمش

بتلاغى فى كيانى

وإزاى ح أبات الليل

بينى وبين الحـــب ..

ييجى سنتى ولا إتنين .. ؟

تقدر تبات يا زين

بينك وبين الحب ..

يادوب فركة كعب .. ؟

........................

اللوحه التالته من الفصل التالت : -

ضى ( نسمه ) خِجِِل شويه

جنب ودن الهوا العفيه

باح بسر قصاد عنيه

عن شفايف ( روش ) نديه

وعن خوخات بلدى شهيه

فوق خدودها المستحيه ..

.....................

باح الهوا وقال وقال

حبة كلام لزوم الغرام : -

همـــس الشفايــــــــف

بالحوار بقا نار × نار

كان بينا كام مللى

لغاها الإنبهار ..

إتلملمت وإتمددت

إتفجرت بنار الغرام

وإتبعزقت بإيد الهوى .

جفون العيون إتسبلت

بالبسبسه ..

كل الحواس إتخدرت

بالسأسأه ..

للبوتقه إتجهزت متشوقه

للإنصهار .

كل الحاجات فِ عنيا

لما بضمها – ف الليل – نهار

وبحس بيها إنها

فيها نسيم الدنيا

ونعيم الحياه .. !

....................

اللوحه الرابعه الأخيره : -

طربت النسمه ..

فهزت للوتر ..

توبها الحرير ضِله إنحسر

إنتفض خوفها وفـر

إرتعش كل البدن

إرتوى بحر العطش

العنب حبه إنتعش

كل الزهور إتفتحت

طلت على شلال عسل

ملهوف على بستان حنان

بستان نتج سِر ف خبر .

بستان ملان أحلى بلح

أبدع قطوف ورطب عجب

من كل صنف وكل لون .

.......................

قربك يا ( نسمه ) طرح فرح ..

ولقاك طرح

عراجين بلح

صدرى إنشرح

دهليزهاويس الملتقى

بابه إنفتح .

عراجين بلح مالت عليا

دقتها ..

شالت شويه

طلتها ودوقتها

طعم الهنا

وطعم السكينه والموده

الممكنه .

حطت علينا م السما

رحمه لنا فى صورة

خلاص من حِملنا .

حطت بآهات اللقا ..

والنشوه طارت بالرضا

فوق فى الفضا

لآخر مدى .

وزفرة الصمت الرهيب

رجِت سكون الأمكِنه

والأزمنه وقفت لنا

وقف تسطر خلدنا

وتهنى شمخه فرحنا

بكلمتين اتنين سوا

وزغـروته زى الطلقه

طلعت فى الفضا : -

يا هـــــــــــوا

مبروك عليك ضم النسيم .

مبروك يا ( نسمه )

هَنَــــــــــا اللُقَــــــــــــــا .

................................

كلمات / محمد عليش متولى .

تمت الليله بخير وسلام

وعقبال عندكم يا احباب .