*** و لساك بتحلم *** بقلم /// الاستاذ فهمي علي

*** و لساك بتحلم ***
و لساك بتعشق حاجات مستحيلة
و شايف سنيك ... بسيطة و جميلة ...
و واخد فى حضنك حكاوى بريئة
و ناسى ان روحك ... ما زالت عليلة
بترسم خيالك ... و تفرح برسمك
و تنسى بغرابة توقع باسمك
فتتمد ايد بعد ايد غصب عنك
تكسر ف لوحتك ... فحزنك يقاسمك
سكوتك بيكبر و يوسع عليك
فتغرق فى صمتك .. و تقفل عنيك
و ترضى ان بكره اللى جاى جوا خوفك
بقسوة يشوفك ... يكتف ايديك
تقابل مشاعرك قلوب كدابين
مخاصمة ابتسامتك و كارهة الحنين
سهرت انت ليلهم .. و ضهرك شايلهم
و لما تناديلهم ... يقولو انت مين
و لساك بتحلم بعالم يحبك
و عشمان فى ضحكة تجلجل ف قلبك
و صحبة احبة .. بتطرح محبة
و تصحى تلاقى مفيش حد جنبك
فقرب شوية و قابل سنينك
و حاذر خيالك شروده يهينك
فتغرق فى دمعك و طرحك و جمعك
فجفف مدامعك .... و ربك يعينك

بقلم /// الاستاذ فهمي علي