فيه ناس..حسن المصري

فية ناس
بتنزح الايمان من جوة القلوب
كلامها دبش
زى الحجارة
طوب ...
.....
وفية ناس عندها الايمان لالىء
عمرها ما تصدى
ولا تدوب
...............
فية ناس عارفة الطريق
وفية ناس
بتوة ف اول خطوة ع الطريق
................
فية ناس دايما تشترى ما تبيع
وفية ناس بياعة كلام
ما بتفتكرش غير الربيع
............
وفية ناس بتقاوح
طرزية يفت
وكلام بيتقال من قديم
وكانة لسة امبارح
........
وفية ناس باعت
وقبضت
ولسة حاجزة المطارح
..........
وفية ناس بتخبى العيون
تتكلم عن الحق بجنون
تطوف الشوارع
وتشحت م الغلابة نفس ضايع
.....................
وفية ناس
غدارة
تنزل دمعة
وتخفى الضحكة عل الفقرا
من تحت عدسة النضارة
ولما تيجى الزوفة
تلاقيهم يلموا شنطهم
ويطيروا ع الطيارة
تسالهم؟
طيب والقضية
والفقرا والمظلومين
يقولولك
ف ستين غارة