زجل مغربي
الصديق
~~~~~~
ليقت الصديق صفا
حسن من الشقيق بالوفا
والشقيق عاد براني غريب
قالب وجهو متنكر
هاد زمان تقلبات فيه المنازل
وتغربات ناس المعقول
مشات يامهم ماولات
تخبل الصفا من الساگية
كحلاتو غبينت الخوت
مديت يدي نگاد الخواطر
المصدية بسوس الوسواس
لگيتني ف حدورا مشقلب
مضروب محرود هم
گاديت وقفتي نداوي
الجراح مسرج الصبر
لي تحسبو حبيب قريب
يتقلب عدو يعض بالنياب
مشيت ف طريقي ودخلت
الجدبة نتحير شادني الحال
دخلت الزاوية مع الجواد
وعلى سنتير الوقت دندنت
فيقت الراگد المغموم
ؤحركت سواكن العيوط
مالكي اليام نكارة قلابة
لي تاق بيك تبكيه محسر
ؤمرة تسحري الملهوف
الشاحف إتوضر ف شهوتك
خوابيك مدفگة سمن وعسل
محطوطة على الجمر
لي يلعق يتحرگ كية
من العوافي الگادية تزهر
لا تلوم اللايم بالزهرالمعكس
غير صفي نيتك ؤالمكتاب
مامنو هروب أراك ما الضور
بقلم محمد حديش
م͠ج͠د͠و͠ب͠ آ͠ل͠ح͠رف͠
11\04\2019
ليست هناك تعليقات:
إرسال تعليق