لسه_القصايد_ممكنه ... بقلم الشاعر / السيدابوطاحون

لسه المشاعر
ماليه القلب ع الآخر
لسه القصايد ممكنة ..
و متمكنه
***********
مين زينا
30 سنه
والشعر هاجر حينا

30 سنه
والورد هربان مننا
30 سنه
والناس عنيها ع السما
متعشمه و خايفه الخطر
يوصل جبال المرحمه
ويهد أحلام المطر
30 سنه
والخيبه ترقص
ف الشوارع والحارات
ف البوادي والحضر
30 سنه
من غير قمر
ولا عاد مخاوى البحر
غير سمك اليهود
يظهر في يوم السبت
والصيد الحرام..
ويطير قوام
لحته ضلمه مبهمة
والمغرمه غرقت
ف بحر ما لوش قرار
بتشد شباك النهار !
30 سنه
والنجمه خايفه
ف السما
ومتلجمه
والقلب بيدق انما
مع كل دقه مظلمه
30 سنه
وفجأة بان الموج
في قلب الميدان
امتي يا ست الكل
يتعدل الميزان
يحضني حقي
في الجنان
والحنان
و الاوسمه !
********************