_______________ العروبة بقت معطوبه ________
من زمان وانا بسمع عن العروبه
كلمه بتتكتب بخط جميل
لقيتها في ورث ابويا مكتوبه
والمعني واضح من غير تقويل
يعني الحدود اللي بنا مشطوبه
وجوانا بيجري الفرات والنيل
زرعتي تتروي في أي صوبه
لا بيبان تمنعها ولا أي عراقيل
الأصل واحد واللغه محسوبة
والكتاب شاهد وفيه التأصيل
وعمره ما كان فيه كلمه غريبه
منهاج مضيء من أصل التنزيل
من كتر الإهمال بقت كركوبه
بعد ما تركووها من غير تفعيل
معاني الصورة واضحة ورهيبه
واجعة قلوبنا بكل التفاصيل
دخلت الإنعاش في غيبوبه
حتي باب الأمل عليها مقفوول
معانيها إتبحترت وبقت مقلوبه
وعايشه حياتها علي السبييل
العروبه إتكتبت وبقت معطوبه
واتولدت معاها المحن والعراقيل
كل ثرواتها في الواقع منهوبه
وهيبتها كشت وبقت كيان هزيل
لما المصالح طغت وبقت سبوبه
وحروفها دابت في الزمن النحيل
والعملة خلت إرادتها مسلوبة
وقيمتها بتضيع من جيل لجيل
عندي الأمل والأماني مطلوبه
مهما كان الشتا في كل الفصول
النخوة جوانا ببناء أول طوبه
وعمرنا ما نعرف كلمة المستحيل
____________________________________
______________الشاعر حسن الشوان ______
ليست هناك تعليقات:
إرسال تعليق