ياضفيرة الفرح
للشاعر/ مدحت عطية
بتضيقى يا دنيا
ساعات
والليل .. صوته بيطلع
يشد النهار من جوايا
كأنك زرعة .. وبتقلع
يا دوب أقول أمى
ألقى النهار بيرجع
يا دوب تهل
ألقى أحزانى .. تركع
مش بخاف
من الحزن
عندى .. أم
مش بحس البرد
معرفش .. هم
هى .. أم
هى الحياه
هى فى موتى .. دم
من قولة .. يا ضنايا
إتعلمت أسامح
أرمى الآه .. ورايا
وأنس وجع إمبارح
بعنيها
تخلينى أتصالح
وفى إيدها
أدوق .. السكر
من بطن .. المالح
فين حجرك
يا أما
فين حضن
اللمه
فين خطوتك
فين شمعتك
وسط الضلمة
ناعى الهم .. ياما
يروح الحجر .. ياما
مين حيضفر ضفاير
الفرح فى بيتنا .. ياما
ياما .. ياما .. ياما
ياماى أنت .. ياما
خايف من برد يوم
أبقى من غيرك .. ياما
وحيد .. تايه فى حزنى
لا خاله .. ولا عمة
ليست هناك تعليقات:
إرسال تعليق