قصائد قصيره (19) *** بقلم السيدابوطاحون
*********
الورد كان شوك
من عرق النبي فتح
صلوا على المصطفى
وبينا ف حبه نتفسح
*عرق النبي
*********
صباح الورد الوانه
رسم للحب عنوانه
ودل القلب ع السكه
فودع كل احزانه
*الدليل
*********
يا حته من قلب قلبى
الخونه قطعوهه
أن مت هيجيبك أبني
وتنتهى التوهه
*توهة
*********
يا مجلس الخراب
المستشار سباب
والواد سب الإله
زور و الحكم تاه
صلى الكلاب وراه
مدد سيدنا الغراب !
*خراب
*********
قولوا عمل ايه الصبي ؟
لا سب رب و ﻻ نبي
التهمه كان بيحب امه
غنى على ربابه ما همه
وحلمه يوم تيجى تضمه
قابض عليه ليه الغبي
*غبي
*********
مستحمله يا ابنى عشانك
وحش الغلا هد كيانك
وف كل يوم اصحى و بدرى
أجرى على ايدى و رجلى
قبل الشيطان بيه م يدرى
يا بهيه فين هيه بيبانك
*مستحمله
*********
كون ومنظمة سيدك
جمال الورد من إيدك
و ورد صبوح بيصبح
يارب ربنا يزيدك
*ربنا يزيدك
*********
يدوم حبك
بريئ ك الطفل في جماله
يقوم قلبك
تبان الصوره في خياله
ويرسم كل يوم ويقول
يغني البحر مواله
*********
يا عسل حضرموت
بتوحشني
بحبك موت
ولما تفوت
ألاقي الدنيا ف إديا
بتضحكلي بعلو الصوت
وأول بصه تسحرني
اقوم اشرب
واتكهرب
وأنا مبسوط
واعلنها
من اول شوط
لآخر شوط
بحبك موت
*عسل حضرموت
*********
بحرالنفوس مليان خبيث و نفيس
يا الف حسره النهر نام مفروس
فرخ الحسود بيقول انا محسود
والحقد باين في العيون لو سود
والقاضي جي المحكمه بالعود
والفرقة سهرت ف انتظار التيس
*نفوس
*********
و عام هجرى
دخل يجري
وعام هجري
طلع يجري
وإييييييييه ب يدبلك يا ورد
يرد .. المظلومين والشرد
وحافي جعان في عز البرد
فقلت
انام و اموت بدري
*الورد_بيدبل_ليه ؟ !
*********
#قصائدقصيره (19)
#السيدابوطاحون
#الأخنوم
ليست هناك تعليقات:
إرسال تعليق