واحد من اصدقائى الغاليين جدا
سألنى لماذا لا أكتب عن المرأة
.............
بيقولوا المرأة
مالهاش دور فى القصص الشعبية.
غير دور الحبيبة
اللى قاعدة فى القصر للفارس مستنية.
طب ايه رأيكم
ان فيه بطلة مهمة جدا فى الفولكلور
و ليها أهم دور.
اسمها فاطمة المصرية....
فاطمة أم على الزيبق
اللى كان كل ما يوقع نفسه فى مشكلة.
تخلصه منها
و يرجع سالم غانم وياها.
و عشان تلقاه
كانت دايما بتنده عليه
و هوا كان دايما بيلبى نداها.
على يا على
انت فين يا على
أمك بتنده عليك.
البطل ،
فى القصة الشعبية
راجل شهم أصيل
يواجه وجها لوجه.
الحيلة مش سكته.
و المفاجأة مش لعبته.
عشان كدة دايما يبقى معاه صديق
له فى الحيلة و التخفى و التمثيل.
و صاحب البطل ده يطلعه لما يقع،
لأن عنده فى كل متاهة
ميت سبيل و سبيل.
فى قصة على الزيبق
أمه اللى كانت بتلعب دور الرفيق.
و كانت له فى كل المشاكل منقذ
بألف صديق و صديق.
المصرية مش سهلة
المصرية شديدة عفية.
و تعرف ربنا كويس
تقية نقية.
و زوجة وفية
و فى حضن زوجها حورية.
بنت بلد أوى
و ف أيتها خناقة
تقف قدامه
تصد عنه العدا.
ما تخافش و لا تهاب
مش بأقولكوا قوية.
المصرية
طول عمرها أخت للفلاح
اللى للأرض الطيبة بيزرع.
و زوجة للعامل
اللى شقيان فى المصنع .
و أم للشهيد
اللى عشان وطننا يعيش دمه بيبدفع.
على يا على
سامع الندا يا على
مصر بتنده عليك
الشاعر العجوز
مرقص اقلاديوس
ليست هناك تعليقات:
إرسال تعليق