ليه يا سمرا ؟ للشاعر سليمان خطاب

ليه يا سمرا ؟
**************
من المبتدا
انا اللى ناصب
برجين حمام ف السما...
بيوشوشو محار الشط
ف عنيكى
وصبيت ريقى ع الغيطان
سواقى تطرطش م اللبن
بقرات
وتبات مع النخلات
تحنى التمر ف ايديكى
وغزلت م الندا عينك
ترمى ع الولاد بصات
تخضر السكة تحتيهم
وترقيهم طيور الحلم
ف عنيهم
ويصحا الفجر يغنيهم
جوا الامل موال
ليه يا سمرا ؟
عشقانى مع الترحال
وراميه حروفى ف الغربه
وانا الخيّال
وحصانى ف المدى يرمح
كما الزلزال
يسف خريفك الناشف
ويقطفلك ربيع متعلق
ف طمى النيل
ونسمة ف المطر صاحيه
ف عز الليل
انا وانتى ف ضمة حلم
بنتوحد
تعالى نزرع حلمنا
ع الضفاف مواويل