( اسطبل قرني ) بقلم الأديب / محمد عليش متولي

.. بالعاميه المصريه ..

.. من القصص الشعرى

.. النص مكتملا ..

( إسطبـــــــل قرنــــــــى .... )
.
تلج الفراغ إشتعل..فقلت اقوم اطفيه..
سألت نفسى سؤال..جاوبت بروحها عليه ..
الفكر بيا إشتغل..وشار عليا اداريه ..
أداريه بإيه يا بيه ؟ قاللى داريه يا نبيه :-
حكى..وشعر ..وزجل وحط إسمى عليه .
طليت على الجرنان..لقيت كذا إعلان ..
فى حى راقى مكان..مكتب مرخص تمام ..
مهمته إنسان..ميت وروحه فيه ..
وإن صح تعبيرى.. ميت وديله كاويه .
خنقت تليفونى .. وقلتله إتكلم..إنطق وقول..
إعترف ..
إلعب ف ودن المعلم..اللى فتح مكتبه ..
إسطبل خيل عالنيل ..( قرنى ابو مسلم ) .
دماغه مليان أرامل ..ومطلقات بالهبل ..
وبنات عوانس عسل ..وزباينه م الاخر..
أغلبها من ع ( النت ) ..راجل عزوبى او ست ..
او شاب نفسه ف ( مزه ) ..معروض عليه كذا بنت .
( قرنى ) الوسيط الحويط..عنده فلوس فى الدرح ..
و له حساب فى البنك .. عنده جواز بالقسط..
وجواز – كمان – بالاجل .
عنده اللى قادره وشاطره ..واللى حداها السكن ..
جواز لمدة سبوع .. او بالكتيرسبوعين ..
او ليله واحده وبس ..او فى السبوع يومين ..!
يا للا اوام بالعجل..إختار شريكة حياتك ..
من صفوة المجتمع ..او تحت خط الفقر .
* * *
على نمرة الاسطبل ..رنيت من المحمول ..
عاللى حداه (بيقول ) : - حلول لتلج الفراغ ..
ولغول كاّبه وكبت..او شبح غربه ووحده..
حلول لحوجه وعوزه..وأفول ف ضى النجم..
وللعنة الفرعون.. ولفك نحس البخت .
وكل الذى منه .. لاّخر المشوار.. مكتب بتاع كله ..!
رنيت .. ردت عليا صبيه..صوتها ولا الكروان ..
مدلعاه لى شويه..مزوقاه بحروف .. منقوطه عطف وحنان ..
بتسيل هيام وغرام ..زى كده بالتمام :-
ألووووووو..مين معايا..؟..اهلا يا بيه بيك معانا..
ياااااااه..دا إنت باشا يا بيه ..وألف تتمناك ..
قلتلها :-
إسمك إيه .. ؟
قالتلى :-
هادياااااا اوى .. هاديه (الجموحه) يابيه ..
فاجئتنى بنت الإيه ..!!
عاوزانى اكون فارس..واجهز العده ..
واْرد رد مناسب على طاقه مفتوحه ..بتطل عالعالم .
اّاااااه .. من جوه جوايا ..!
اّّّّّّّااااه .. من برد ايامى ..
اّااااه ..يا دنيا يا حرامى ..سرقتى ليه شبابى .. ؟
ووقفتى على بابى .. تطلعى لسانك ..!!
رديت على هاديه..وكلى يتمنى .. الصوت مع الصوره ..
يا سلام يا بو مسلم ..يا قرنى يا معلم..
اول قصايدك غنا..ولحن رج الفضا..وخلى خرسى وسكاتى ..
ينطق ويتكلم..يا قرنى..ياااااااا معلم ..!
ضحكت بلون بمبى .. و بكلهاقالتلى :-
طب قوللى يا صاحبى ..شاعر وعزبنجى .. ؟!
إزاى دى تيجى يا ناس ..!
الشعرا دول امرا ..لو حتى كانو مماليك .
رديت وقلت :-
يا هاديه..انا ملك روحى وحر ..ونبض قلبى حر ..
وخط قلمى حر .. وشعرى – برضك – حر .
قالتلى :-
اهلاااااااا بيك ..يا ريت تسيب إسمك..وتقوللى إيه طلبك..
يتيجى لو حبيت .. اقله نتعرف..ويبقى ده احسن ..
تيجى ..؟..نشوف ونتشرف ..وجها لوجه يا بيه ..
يااااه جرجرتنى فى الكلام..اّااااه منكو يا شعرا ..
و(..) كلمه من طرف اللسان..حرفين دلع.. من ( اهازيج ) الغرام .
نفسى ف قصيده منك ..توصف محاسن جمالى.
الفكره جات منها ..وهيه جوايا.. (المزه) سبقتنى ..
دعتنى ..يا هنايا .
دى شغله مدروسه..والخطوه محسوبه..أروح..؟
اروح .. راح اخسر إيه ؟
اقله يرتاح فضولى..واشوف نظام عولمه ..جديده ف حقوق الانسان .
وافقت عالفكره..وخدتلى ميعاد قريب..من المعلم قرنى ..
وبلغتنى ان ده..مخصوص لخاطر عيونى .. المغرمين بالجمال .
جهزت نفسى لمعادها..وضبت كل الامور..ورحت اجرى بنشاط ..
ألحق مكان عالبساط .. اللى انفرش بالحوار..عن عولمة انسان ..
له حق فى الاحسان ...!!
* * *
وقبل ما اوصف لك هاديه .. اوصف لك المكتب يا همام :-
مكتب فى دور ع (الروف ).. فوق السطوح عالى ..
مفيش عليه سكه لسكان..غير اللى قاصده من الثوار ..
الواجهه اْبهه ع الاّخر.. ومدخل الاسطبل تمام ..
والصاله مبدوره بالسجاد..وكراسى جلد بقاعده سفنج ..
وابليكات ..وكتير مرايات.. ونجفه مليانه كريستال.. !
* * * * *

مكتب لذيذ ..من نوع (هيلاهوب) ..وفوقه صحبه فى إيد (فازه)..
ورد وفل من الطازه..وجهاز حديث جدا.. (لاب توب)..
وعلبتين مناديل (كلينكس) وفى ركن شلته خصوصى للست..
الست هاديه السنيوره .. صوت عندليبى ..ف قد غزال...
صوت عندليبى ف قد غزال..او مهره لسه علوم فى سباق ..
والبشره قز حليبى .. يا خال .. بياض طبيعى بحمار خدين..
وشعر ناعم متسرسب.. غامق بلون الليل فاحم ..
طويل وهادل ع الردفين .. فوق الكتاف نازل يهبل .. لا اما العيون ..
فعيون ظبيان .. وحورها فوق وصف الانسان ..
ليها حواجب ع الفتله .. ورموش سهام ميبطلوش ..
طعن فى ننى العين احلأم .. مبيرحموش قلب المسكين .
الرموش فوق العيون .. بعتت رساله مصوره...
والعباره مزوقه بحروف نديه معطره .. ومعاها
صحبه من الورود بعبيرعسل .. للأمل بتقول
حكاوى مسطره .. والشفايف كاس انا ناس .. تتمنى روحك
والأحساس .. رشفه خفيفه ولا اتنين .. من بسمه حلوه مسكره ..
فوق شفايف(روش) لذاذ .. عليها نسمه معطره .. من سكره
بتدوب حنان .. وبدون خجل بدرت غزل .. من قد فن وسحر حسن ..
مستخبي ورا الهدوم .. قد زي غصون البان .. والكف بض ..
عجين (فينو) .. وصوابعه موز بلدي بريحه ..
لكنه مستوي ع الهانه .. سنيوره لآبسه ..
(قزح) شفاف .. هفهاف .. غازلتها ب ألآطه ..
ردت عيونها ببساطه : - كل منايا أكون وياك .. ف براح قلبى ..
تفضى شقاك .. وعلى كتافك احط امالى .. وافرد حبى ..
شر اع فى هواك .. كل منايا (قصه) لحبى .. قصه لبكره..
قصه لبكره ويومى وامبارح .. قصه لأملى ..
قصه لحلمى .. قصه لبوحى وولعى الجارح ..
كل منايا ابقى حكايه .. ابقى روايه فصولها معاك ..
حقيقه رقيقه تطول وياك .. انا دلوقتى بحس وجودك ..
قلبى بإيدى مسكاه من خوفى ..إنك ترفض ..
نقطف سوا من زهر الورد .. نقطف سوا ..
من زهر الورد .. ونرشف عطر الهوى والحب ..
ونروى شقوق ومروج القلب .. ونغسل روحنا ..
ونغسل روحنا بلحظة وصل .. تساوى ساعات ..
بلحظه وصل تساوى ساعات ..
لحظة وصل تساوى العمر.
قلت :-
الله .. الله ع الشعر .. غـُنى مع بوح .. بيردو الروح ..
ضحكة ضحكه .. بلون الخوخ .. شفت خدوخها بلون الجمر ..
قلت :-
يكفيك كام يا مدام فى الشهر .. ؟ ضحكة ضحكه بلون الصبح ..
مال فى الحال .. شعرها ع الضهر قلتلى :- ... يا بيه ..
دا كلا ينقال .. ؟ .... انا بختار شاعر قصاص ..
قلبى لسرده رق ومال .. فقلت أنعينى .. الماضى والحال :-
ضيعت عمرى - انا - فى الأسفار ..! ..قلتها بصوت (عبد الوهاب )..
(فى سرى) .. انا من ضيع فى الاسفار شعره ..!
قلتلى :-
إيه .. ؟
قلتلها : -
مفيش ..
دامطلع النص الشعرى .. اللى نويت اكتبه فيكى ..
قلتلى :- ... بسرعه كده من غير ترتيب .. ؟
قلتلها :-
اّه .. وليه الترتيب .. ؟
دا قرينى رهيب .. لما يشوفنى فى بحر الحب ..
يرمي لى طوق مليان هوى عشق ..
واما يشوفنى فى بحر الشوق ..
يبني لى بيت على شط القـُرب ..
واما يشوفنى لوحدى حزين ..
يلا غينى أقوم أهز الأوتار ..
ولما اكون بارقص فرحان ..
يدينى كاس مليان أفكار .
قرينى جالى يغرقنى .. فى بحرك العطشان اشعار.
وانا لما شفتك وسمعتك .. ماكنش حلم غريب ع العين .
وماكنش لحن غريب ع الودن .
قالتى :-
ياااااااااه .. دا إنت يا استاذ .. أوى أوى للهوى حساس .
مش بس جواهرجى مشاعر .. دانت اديب مبدع فنان .
اقعد هنا .. تعلا لى جمبى .. وشويه مالت بالاغصان ..
عليا .. فى ايديها صينيه .. عليها كاس فاضى (كريستال) ..
وعليها علبه دهبيه .. مدهونه رقه وحنيه ..
مليانه بالشهد الفتاك .. شيكولاته معجونه بالكونياك .
انا شفتها .. دُخت .. خطيه ..
هاديه الجموحه شيطان فى ملاك ..؟

* * * * *

حصل تداخل طيفى رهيب ..
بين الحطب ومابين النار ..
وعلى إيدين ( هاديه ) الانسان ..
قربت مسافات الابداع ..
ودابت حروفنا فى الاستقبال .
باقى دقايق عالميعاد .. وفجأه ..
لاح فى الجو ضباب ..!
راجل شباب وف طول الباب ..
ومعجبانى .. .شايف نفسه ..
(قرنى ابو مسلم نفسه ) .
بغرور كتير .. من غير دستور ..
ولا ( إحم ) ولا حتى سلام ..
خش – بكلامه – فى مزاجى شمال .. !
ودا من من خصال بعض الكهان ..
وخصال رجال اعمال جهال .
زعق .. وقال اللى ما ينقال :-
مش عيب كده يا راجل بطال .. ؟
يا .. واحد طلع م الدنيا وشاب ..
مش عيب كده يابو عين زايغه .. ؟
فوق الحرام بترش كلام .. ؟!
ليه بتغازل فِ سكرتيرتى ..
مفتاح سر اعمالى وجارتى .. ؟
رديت وقلت :-
انا غرضى بسيط . .
قصدى أنفّع واستنفع .. مش برضه ده ..
مكتب لوسيط ..
فى جواز ب (كاش) او بالتقسيط .. ؟
وسيط لفك نحوس البخت ..
عنده حلول لفراغ من تلج ..
وغول كاّبه اوسخط وكبت ..
وظلم غربه ووحده وهجر .
وسيط حلول حوجه وعوزه ..
وعنوسه .. ولعكوسات النجم ..
وللعنة الفرعون فيه حل ..
وقراية الفنجال والكف ..
عنده حلول لأبو بخت اسود ..
وابوقلب زيه بلون الفحم ..
وسيط بتاع كله ..
حتى الحبوب الزرق .. تلاقيها فى محله ..!
سكت شويه وقال :-
طلبك .. ولخص بقا فى القول ..
مع بسمه صفرا منه قال : -
شكلك خبص لى .. عامل دماغ .قبل ما تيجى ..
وجاى رايق قوى .. مرتاح ..!
قلت :-
ارزاق يا دنيا لناس غير ناس ..
كان نفسى اشوفه بأى فلوس ..
لكن بأه ببلاش شفته..
ومراد عيونى خلاص نلته ..
ونفسى دلوقتى فِ جيرته ..
وأقول له كل اللى ما قلته ..
انقل له كل اللى عايشته ..
ومت فيه بعد ما عشته .
هاديه الجموحه جندول ..
هاقول لها المختصر ..
لازم اهزم المجهول ..
وعلى خريفى أنتصر :-
شراع هواكى إنطوى من يلاكى ..
ومجداف لقاكى إنكسر من (مسلم )..
ودفة رضاكى بمركب هناكى ..
حدفها صباكى ببحر( المعلم ) .
يا موج شط بحرى ..
ونسمايه بدرى .. لدمى بتجرى ..
وتدينى حبه .. تقويلى عزمى ..
افول :-
مش كفايه ..!
حروفى وسيله .. نبيله لغايــــه ..
يا غايه جميله .. يا ابدع حكايــه :-
شراعى بهواكى .. هجدد هـواه ..
ومجداف لقاكى .. راح أجبر جفاه ..
ودفة رضاكى .. بمركب هناكـــى ..
بحبه ( سماوى ) .. تعود للحيــاه ..
تعـــــــــوووووود للحيـــــــاااااااااه ..!

* * * *

كلمات الشاعر الأديب / محمد عليش متولى
من القصص الشعرى بالعاميه المصريه
المجموعة السادسة (إسطبل قرنى)
النص مكتملا .
الإيداع القانونى/ 19590/2010
الترقيم الدولى/ I S B N/977-17-9622-