قصيدة ( يا عيال) بقلم محمد عادل

قصيدة ( يا عيال)

(محمد عادل)

يا عيال بتجرى فى الشوارع رجلها حافيه
اثبت على موقفك هتعشها بالعافيه
والله يا بنى ما تفرق حاجه عن ابن الذوات
واهوا كلنا بنقول كان جدنا الاكبر
كان عنده قصر ومات
الكدب يتورث ....
حافظ على ضحكتك ده ضحكنا بيخلص
احنا اللى دايما نقول الستر والصحه
كل اللى نحلم بيه شبرين من الفرحه
نغطى بيهم فى برد الليل ونتقابل انا وحببتى
وبلدنا عايزه فيك راجل
يا الولد أبتسم لو متنا ايه هيكون
دبابه ايه اللى تقتل من البشر مليون
وحتى لو متنا مليون .... يعيش تمنين
اقتلنا تصبح تلاقى غيرنا ناس تانيين

يا طالب الحزن مد ايدك على بلادى
اكبش بأيدك وطلع كلها كأبه
خد من اليمن دمعتك والصرخه من تونس
واعلن حدادك فى ليبيا تحت دبابه
عدى على مصر فيها الحزن مش عادى
واطلع على سوريا طفل بتنهشه ديابه
كداب كتاب العلوم فى اولى اعددى
كان اولى قالوا الاسد ده عرة الغابة

يا عيال بتجرى فى الشوارع كدبوا التعليم
متصدقوش التاريخ ده بيكتبوا بملاليم
حكامنا يا بنى بعونا واحنا لم نقبض
قبضوا التمن مننا ويا ويله من يرفض
واللى يقولك حاربنا قولوا روحنا بلاش
مات مننا قدنا والباقى راح ومجاش
اجدع شباب اترفع فوق السما دى بسما
جمب النبى مجلسه خالد .. سعيد .. انما
على قد فهم الشباب ده متخلقش عشان
يخيروك يا وطن نص العمى يا العمى

احنا اللى شرعيه واحنا الضعف فى المية
واحنا اللى زلزلنا عرش ابو طلعه جويه
واحنا اللى نقدر نشيل بالعافيه و بالذوق
متقولش كان اختيارنا وكلمة الصندوق
دا احنا اللى علمنا صح ونصنا جهله
كيلو الدقيق مصلحه والمية جنية امله
بتشترى الصوت بجوعه وتحاسبنى عليه
متحاسب اللى بعونا الأغبيه السفله

يا عيال بتجرى فى الشوارع منها واليها
يوم ما الوطن ينجرح هتنام على الاسفلت
راح يجى جيل من العيال دى يعدل المايله
متقولش راحت كفاية يا صحبى دا انت حاولت
على الاقل العيال دى بترضع الثوره
وقت ما كان تنضرب ويقولوا ليك معلش
ويلبسوك مريله ويدوك حاجات حلوه
ويدخلوك مدرسه وينجحوك بالغش
ويخرجوك جم اهلك عاله وبطاله
ويسوق فيك كالغنم
ويهشوا املك هش
ويكلموك ع الشرف
ويرقوا مين يرتشى
و يكلموك ع الترف
وياريت تساوى قرش
ويخدروك بالامل
تبحث فى فرصه عمل
زى اللى بيدور على ابره وسط القش

ادى اللى عمله النظام
ادى اللى اسمه نظام وفباطنه فوضى
ادى اللى اسمه سلام .. والاصل بنطاطى
انا اساوى عندك كام بدمى وحياتى
انا دمى بقى ميه يا وطن ديمقراطى
يا رأس مالية .. المال ده مش ليا
المال ده للى بيجرى فى الحارات حافى
يا ثورة سلمية .. قامت على كتافى
بيسلموا المفاتيح للى ما بتش جريح
للصوره للمنظر .. دور على المصدر
مش امر بالمعروف ولا نهى عن منكر
ده امر ليك بالخوف.. واياك بقى تفكر

العام ونص العام بيحاربوا فيك يا وله لو كنت بس لاحظت ..
مين قاصده يبني البلد مين قصده يقطم وسط
داوي الالم بالامل ده مفيش خلود للفشل ومفيش نجاح بالقسط
سايق عليك النبى والعشرة يا ابن العمر
سايق عليك البلطجى وست البنات
واللى انجرح يوم واللى مات
واللى اترمى على المر
لو تقرا فى الاخبار عن مين نهب مليار
انا عارف ايه هتحس

ارفع دماغك فوق ده الفقر فقر النفس
فقر الرضي الاحساس
هتلاقي ناس مش ناس
هتلاقي مين يوعدك يعمل في خده مداس
هتلاقي مين يعجبك شكله مابين الناس
فيه ناس بتلبس جزم وجزم بتلبس ناس
وفيه ناس تلمع جزم اشرف كتير من ناس
وفيه ناس بتلحس جزم عشان تراضي ناس
وفيه ناس بترمي جزم علي وش اتخن ناس
وفيه ناس تخاف ربنا وفيه ناس تخاف من ناس