رساله من إبن فى الغُربه شعر/ م . محمد الجوجرى
با بعــتـلك سلامــى يابــا *** من فوق مرتبه مسفوطه
من غير سرير خالـــــص *** وهى عاالأرض محطوطه
وجنبى حله كبيره ومعلقه *** وطبق فيه حتة بلاميطه
وكوبيات شــاى بتفلـــــها *** محتاجه شطفه وتظبيطه
وهدومى يابــا مكومــــه *** قميصى وبنطلونى والفوطه
وحاجتى يابــا مكركبـــه *** وكراسى مكسره ومربوطه
طول النهار واقف بشتغل *** ساعات كتيره بمهيه مشروطه
كنـت عنــدك ياوالـــــدى *** واد فِـتك وعامـللى فلوطه
أنا كنـت فـاكر يابويـــــا *** إن الحكايه سهله وبسيطه
لقيت هنـا بهدلــــه أوى *** وحاجات كتيــره مغلوطه
وشغل عتاله ومرمطه *** والشهاده عاالرف محطوطه
الكل هنا شقيان وتعبان *** وماشى ياولدى جنب الحيطه
شكلها كده هارجع يابا *** من غير زيطه ولازمبليطه
فين ياوالدى الرحرحه *** وسهرالليالى ونومه وتمطيطه
ياريتهـا دامـت يابويـا *** وبلاش شغــل إبـن بطوطـه
حتى اللى سافروا بـره *** لبلاد الجيينز والبرنيطـــــه
كتير فى البحر بيغرقوا *** واللى يعدى حياته ملطوطه
أيــه الـــلى خلانا كــده؟ *** كفاله وعتاله وحياه مسخوطه
واللى يغلط يابا يرحلوه *** ويلبسوه تهمه مش مظبوطه
هى بلدنا مش محتاجانه؟ *** بقينا ملطشه وحاجه عبيطه؟
زى مايكون مش ولادها *** ولا معمول علينــا تربيطـه؟
سالملِلى يابـه علـى امـى *** وحشنى أكلها اللذيذ أبوقوطــه
واخواتى إزيهم ياوالدى *** سعيـد ومـروه وفطوطــــــه
نفسى بـقه أرجــع لهـــم *** زهقت والغربــــه ممطوطــه
هى لسه البطاله عندنــا؟ *** مفيش عندكم أى تشبيطه؟
مصر طول عمرها عظيمه *** بس فيها ناس مقلوطــه
فلوسها وخيرها كتير *** بس مسروقــه ومشفوطــــه
هـو الحـال هيفضـل كـده *** والناس هتعيش كده منقوطه؟
يارب عدلهـا معانـا بقـه *** وتبقى منظومه ومخطوطه
ليست هناك تعليقات:
إرسال تعليق