قصيدة #مجرة_قلبي_الكونية كاملة
*****************************
فـي مَجرة قلبي الكونية
موجودة نجوم الحنّيّة
و كواكب الطِيبة الفتانة
ونيازك الكلمة المتصانه
والعين قمرايه وبهيه
مربوطة بِقُوىَ مغناطيسية
فتكون الوحدة في تكويني
لو بعدت ميزه عن التانية
فَساعتها تكوني بتمحيني
دا لأنك أصلا تكويني
النظرة الوحدة بتكفّيني
و بتخلّيني أطير لبعيد
زي العصفور اللي يغرد
لما يكون فرحان وسعيد
بيدندن اسمك بلسانه
وبيغنّيلِك مـ الأناشيد
عايش على نجم الحنّيّة
مش موجود هنا فـ الدنيا
بيكون سارح فـ التجاعيد
أول ما يشوف روحك يجري
يحضنها فيحس أمان
وفبُعدك لحظة يقوم يبكي
فيدمّع ويعيش حرمان
حرمان من طيبه بيهواها
من لحظة خوفك على روحه
من ضحكه عمره ما ينساها
لحظة ما تهججر فـ جروحه
أنا أصلا دايب فـ عنيكِ
عاشق حنّيّة معاليكِ
وكلامك كله نغم ألحان
لو جيت فكرت انى أفرّط
لا يمكن اكون أصلا إنسان
فـي مجرة قلبي الكونية
من دونك أنا مش إنسان
#في_مجرة_قلبي_الكونية
#محمد_دويدار
من24/6/2016إلى 7/7/2016
ليست هناك تعليقات:
إرسال تعليق