***زجلية مغربية تحت عنوان:
***اللًهْطة***
اه،عليك يا لَهْطة ؤُ مَ درتي فِ لْقوم لمعمية
لِِِ عندو شوية رْيوكَو سايلة ، ؤُ مَ كفيه
ؤل عندو لَكْثير ،لقنعة غِير لغة وتسفيه
يخطف حق غيرو ب تَغْرير ؤُلكذوب ؤُلَحْمية
مالين لهطة غرقين ف لخطفة ورِبا وَتًبدير
بغاو يعيشو غيرهما ،ؤيَتْحكموا ف الغير
وَخًا استعبدو الطيور الحرة ،م قْضاو مزية
بنادم ياكل م يْحسْ مَ يَشكر ؤم بشبع
فِ رزق غيرو يدو سريفة حية تخلع
جَرْداتو اللهفة من الإنسان والقيم الادمية
بل رَدًاتو وحش كذاب نصاب سمسار
وخا مزوق ما يعرف حشومة ولا عار
لًهْطة بْلاتو فَتْحول شمشام ؤُعْل ريال حْدية
نفسو أمًارة ب سوء فشوف كِ رماتو
وْسخ الدنيا عماه وفي الشر جلاتو
دار فيها معلم وعايش فِ سًحْت ؤلمعصية
باع الْأَرْض ولمحبة والصلة والصواب
صياد النعامة طماع شانو في تراب
ؤهو ؤمالو ملهوط مْجوعِف ؤمَ يَسْوَ وْقية
صياد حق الضعيف ؤلِ مَ يَكْسابْ ريال
حَقًار لَْفقير م يسوى بصلة بين الرجال
ؤمَ كرهش يسلب لَضْعيف حصيرو ولبطنية
نسا البرًاكة والنوالة والعشة والجار
حَمْقاتو اللهطة ، فطْغى، ؤصْبَحْ غذار
اللهطة حرماتو من العزة والقيمة والنية
ف سوق لكلاب لملهوط ولاًً زْعيم
باعْ هْلو ،خذع الميمة والبو لحنين
صفصاف خاوي ؤما فيه خير ولا حنيًة
اه عليك يالهطة ؤمدرتي في رعاوين
هادوك ل نساو الله ؤُباعو تْراب وَدين
هادوك لخانو القلم ،غرقوها في الجاهلية
حرام عليك يا لهطة ؤم درتي حرام
عميتِ لبنادم لبصيرة ؤعجبو ظلام
ؤل ظنيناه ولد ناس، ردتيه قْطاطعي حية
اَه ،اه عليك يا لهطة...
ؤ م درتي ف لقوم لمعمية
بنادم هبل ؤساب ...
ؤمكان غير نجري عليك ،جري علي
اَه ،اه عليك يا لهطة..
***الشاعر والزجال:أحمد الكندودي ***المغرب***
ليست هناك تعليقات:
إرسال تعليق