همسات (1)
___________________
بالحب يعيش الكون
بالحب الصعب يهون
والليل يبعت أحلامه
ويخلي القاسي حنون
____________________
الحلوة دي بنت أصول
علم وأخلاق وجمال
وانا هكتب عنها واقول
شغلتني ليالي طوال
____________________
احضن حروف الأمل
واهزم شعور الخوف
وارفع شعار العمل
هتعدي أي ظروف
____________________
سنة جاية بخير وأمان
ترسم في قلوبنا طموح
للفرحة تكون عنوان
للعدل يكون مسموح
_____________________
ماشي في وسط البشر
ماسك في إيدي ورود
بالحب قلبي انتصر
عدى جبال وحدود
_____________________
قول الحق و لو كان مر
مفيش إنسان ينفع ويضر
اللي بيعبد مصلحة عبد
واللي بيعبد ربنا حر
_____________________
كلمة في ودن الوطن
يشهد عليها الزمن
بالعدل بس تقوم
من كل كبوة ومحن
_____________________
اليأس خصم عنيد
أعنف من الإعصار
يصنع خدم وعبيد
ويدمر الأحرار
_____________________
يا شعب فوق من غفلتك
شيل الفساد من سكتك
مستني مين في زمن عجب
يرسم ليالي فرحتك
_____________________
الحلم هيفضل وردي
مهما تكون الأحزان
والعزم سلاحي وعهدي
ولا عمري عرفت هوان
_____________________
يا قلوب الحب ملاها
والخير ف عيونها بحور
لو يوم الناس تنساها
بيغيب ف طريقها النور
_____________________
لون الشوارع ندم
على كل كلمة نعم
للي رمونا في نار
وصبحنا زي العدم
_____________________
أنا عندي بحور أفكار
هتحل مشاكل الناس
وهترسم أحلى نهار
بالحب وبالاحساس
_____________________
شعر / محمد الشرقاوي
ليست هناك تعليقات:
إرسال تعليق