سجال بعنوان نار وبارود بيني وبين زوجي الشاعر وليد الأصفر
...........................................
ملك
يسعد مساكن أول كلمة رح قولا
و الفرح إنتواوالمحبة ع أصولا
بهالسهرة الحلوة رح منعيشكن فرح
ونقطف نجوم الليل من السما انطولا
.........................
وليدقوموا لنطفي النار بدمعة العين
ونزرع هوى القلبين يطلع وردتين
مصيبة إذا العشاق ما بيتعاتبوا
الحب اشتباك وزلزلة للمهجتين
..........................
ملك
لاتهديني باقة ورود
ولا تقلي بحبك موعود
قلبك ما بيعرف يحب
قلبك من نار وبارود
....................
وليد
هالباقة عربون الشوق
مش عربون العبادي
بعبد ربي وحدو وبس
وقلبي مش لونو رمادي
.........................
ملك
مشينا انا وأنت بهالدرب
وزرعتك وردة بهالقلب
رميت بسهمك يا غدار
وخليت نار الغيرة تشب
...........................
وليد
أنا ما حكيتلك عالحب
وما قلتلك حبيني
والحب هدية من الرب
مش حقك تملكيني
.......................
ملك
ياقاسي قلي شو ذنبي
بحبك توهتلي قلبي
شربت منك مر الكاس
وبقيت انا وحدي مع غلبي
.........................
وليد
إنت ما حبيتي بجد
هيدا اللي إسمو إعجاب
أنا ما حكيتلك عالحب
ومش فاتحلك هيك بواب
...........................
ملك
ياودود و يا ودود
الغيرة ما في إلها حدود
لا تصب النار على الزيت
وتضل تقوس بارود
.........................
وليد
الغيرة ضعف وقلة عقل
وهيدي طبعا مالا حدود
واللي بيشعلل النار
ما بحرق صخر الجلمود
.........................
ملك
لاتقرب لا تعذب قلبي
كرهت كل شي إسمو محبة
ما بدي إلعب بالنار
ولا بدي توه بهالغربة
.........................
وليد
مش فارض نفسي بالزور
ولا حامل جرن الكبة
أنا واقف عندك بالدور
ومش شايف منكي محبة
.......................
ملك
بقربك ما شفت الحنية
وكان قلبك قاسي عليي
انا قلبي مش لعبة بإيدك
دخلك كافي تعذب فيي
........................
وليد
لقيتيني ماشي بهالدرب
رميتي عليي شباك الحب
وما سألتيني رأيي إن كنت
بهواكي بروحي وبالقلب
.......................
ملك
ياما بكيتن عينيي
وياما جرحتن إيديي
واقلعت بإيدي شوكاتك
وإنت ما بتفكر فيي
.....................
وليد
سلامة عينك تعصر دمع
وجروحك يشفيها الرب
وشو ذنبي إن شفتي ضبع
بطريق مسيرك عالدرب
.....................
ملك
زرعتك بقلبي نوار
وبنيتلك أحلى دار
لكن إنت قلبك أسود
ورياحك متل الإعصار
....................
وليد
قلبي أبيض متل التلج
وأرضي مفروشي بالمرج
وريحي بلسم للمجروح
وحصاني على ضهرو سرج
....................
ملك
لا تفكر تقسى عليي
غيابك ما عاد أثر فيي
وما عاد قلبي يحن عليك
ولا عدت شمسي المضوية
.....................
وليد
هيدا مش شغلي يا ست
إن كنتي حلمتي بالسهرة
غيابك وحضورك بالبيت
مش رح بيغير بالفكرة
....................
ملك
ضويت بإديي العشرة
وحلمت بأحلى بكرة
لكنك هديت الحلم
وكويت القلب بجمرة
..................
وليد
قلتلك إن حلمك ضاع
مابيخطر على بالي
عيفيني من هالأوجاع
حابب إقعد لحالي
.......................................
ملك
قضينا هالعمر وعود
وحلمنا بأحلى الورود
وفجأة زادت هالغيمات
وسمعنا بالسما رعود
.....................
وليد
أنا ما وعدتك بالجنة
ولا عطيتك كلمة وشروط
حلي عني يا كنة
الحماية حكيا مظبوط
.............................
ملك
لملم خيباتك وارحال
أنا عنك ما عاد إسأل
لا بدي الزير ولا البير
ولا بدي مي بغربال
.....................
وليد
باي باي عليك وسلامات
مليح اللي طلعت منك
ما عندي زير ولا بير
ولا رح بستفسر عنك
.....................
ملك
ياما ل الله صليت
واتضرعت ل رب البيت
تا يبعد عني الأشرار
ويطفي النار بقلب الزيت
.....................
وليد
الله ربي رب قلوب
وحكمو ما منو مهروب
الله يجنبنا الأشرار
ويعطينا بجودو المطلوب
......................
ملك
كلماتك كلا بارود
ونار بتحرق حتى الموت
بتكوي القلب والأضلاع
وبتودينا للتابوت
.....................
وليد
كلماتي دغري وعالقد
ومي بتطلع فوق السد
بتحيي المهجة والأضلاع
وحلوة وكلا متل الشهد
....................
ملك
يا آدم خليك رقيق
مع حوا وأجمل صديق
هية أمك وأختك
وشريكة عمرك ورفيق
.................
وليد
إنتي أمي الحنونة
وأختي وإنتي بتموني
وشريكة قلبي بهالعمر
ومهما بتكوني كوني
......................
ملك
بتقلبلك حياتك نار
لو عرفت إنك غدار
وبتعمل بيتك جحيم
وإذا بتهينا يا ستار
.....................
وليد
أنا مش خايف منك غدر
ولا بغدر فيكي بهالعمر
أنا شاري حبك يا بدر
وقلبي مش قطعة من الصخر
....................
ملك
وحوا كلا حنية
وملكة وأحلى حورية
لو بتعيشها بمحبة
بتحيا عيشة هنية
...................
وليد
أنا بعرف إنك هية
الملكة شمسة الحورية
وقلبي مفتوح عليكي
تا تعيشي عيشة هنية
......................
ملك
حوا بتبنيلك بيتك
وبتجبلك الذرية
حاول تحطا بقلبك
وتحيطا بالحنية
....................
وليد
قلبي وبيتي وأموالي
ملكك بس صيري حلالي
هاتي إيدك تا نبني
روضة وقصر لأطفالي
...................
ملك
واطفي النار كب البارود
وخليك بالسيرة محمود
إنت وحوا حبايب
لون حياتك بورود
...................
وليد
مافي بارود بإيدي
وما عندي إلا قصيدي
إنتي افراحي والروح
وإنتي الدم بوريدي
....................
ملك
يا آدم يا عينيي
أنا حوا أحلى هدية
إيدي بإيدك تا نعمر
ونبني للإنسانية
...................
وليد
يا روحي قلبي معلق
بهواكي من الصبحية
إنت وردي والزنبق
وإني شمسي والفية
.....................
ملك
وبنهاية هالسهرة الحلوة
بدي ودعكن
وبرعاية المولى
العالي بدي اترككن
وكل سجال وإنتوا بخير
وعين الله بتحرسكن
وتصبحوا على ألف خير
ورضا الباري يونسكن
.......................
وليد
بالإذن منكن يا حبابي السامعين
رح بترك السهرة وأنا قلبي حزين
خايف لمرتي تزعل وتحمل أسى
قو لولها إنها الهوى والله يعين
........................................
مع تحيات
ملك محمود الأصفر
وليد الأصفر
ليست هناك تعليقات:
إرسال تعليق