عدوتة مخنوقة
………………..
لية يابوى علتمنى
الحنية والطيبة
ونسيت تعلمنى…
الحساب ….
عدوتة مخنوقة
ع لسان مشلول
مش قادر ينطق بيها …
وبسمة فوق الشفاه
مرسومة
وعيون حزينة
ودمعه مش عايزة تنزل
واحزان كتيرة
ف قلب طيب
وهموم فوق الكتاف
تقيلة
ليه يابوى
علمتنى الحنية والطيبة
دا عمك
ودا خالك
ودا جدك
ودا سيدك
ليه يابوى
علتمتنى
الحواديت
انام ف حضنك
وانا باحلم انى بكرا ابقا
الشاطر حسن
ولا الزناتى خليفة
ليه خلتنى
اتعلق بكتب الحكايات
والمواوبل
والف ليلة
وليلة
ونسيت تعلمنى
الحساب
وارسم على الحيطان
ست الحسن
واحب الناس
والنخل
والنيل
والغيطان
وحب الوطن
فرض
زى الصلا
بالظبط
وما عرفتش ف يوم
يابوى
تعلمنى ازاي احب
نفسى
ليه يابوى
سبتنى بدرى
عود طرى اخضر
ولسة باتعلم
اول درس ف
كتاب الحساب
عدوتة ع لسان
مشولول مش قادر ينطق بيها
انام على امل ف بكرا
البسمة تكبر
والفرحة تبقى
فوق شفايف الوطن
كل الوطن
مرسومة ع الحيطان
يزول الهم
من ع الكتاف
واقول موااااااااااال
تتغنى بيه كل اهل
مصر المحروسة
………………
بقلم // جمعه عبد المنعم يونس //
مصر العربية
23 يوليو 2012
ليست هناك تعليقات:
إرسال تعليق